模．型．人 模型事
序
先要多謝兩位好兄弟兼twinspanda既創辦人Sam哥同Pan哥俾個機會我係度開個BLOG寫下野先！雖然本身都有兩個BLOG，不過都係無乜主題既，既然新開張，我就寫下同呢兩位兄弟一樣，正職之餘既兼職──模型製作！
模．型
什麼是模型？就像李小龍先生的一句：以無法為有法，以無限為有限。
模型就是一種模仿形態的技倆，模型製作是不限方法，不限素材，但求以任何方式去表現箇中的神髓，不僅是靜態上的神情，甚至連動態上的活力亦需將其重現，務求達至“以假亂真”的境界。
模型亦分多種，我的專長“高達模型”就是其中之一
型．人
大家唔好誤會，我一Ｄ都唔係型人（笑），我想表達既係即使我鍾意砌模型，但唔代表我好似日本果Ｄ御宅族一樣，足不出戶，或者係對動漫有異常興趣，不擅長與異性溝通等等！除了砌模型，我都鍾意戶外活動（打波游水行山踏單車）、社交應酬（落ＢＡＲ去ＰＵＢ，飲下紅酒），於我而言模型已經唔係興趣咁簡單，已經係升華到能夠賺錢，每個月多數千元既收入！
而且製作模型既過程中能夠磨練我既耐性、細心、鬥志，呢Ｄ都係能夠幫助我係正職場上既打滾！
模．型．人
我相信唔少人既童年都睇過唔少動畫啦？求其數都可以數到好多出黎。無論人型好定係機械人都好，我相信好多朋友們都想自己可以擁有動畫裡面既角色模型，一圓自己既夢想。時至今日當自己有一份正職，要養家消費，衣食住行樣樣都要兼顧，即使有餘錢亦未必有多餘時間同精神去實現自己既兒時夢想；而即使時間許可，奈何自己未必有技術咁漂漂亮亮完成一件模型，亦唔想隨隨便便去完成一件模型。
所以先會有我既兼職出現──代客模型製作。之後我會不斷係呢度上載我模型製作既過程、當中如何解決難題、甚至係完成作品既相片，希望大家對模型有興趣既都可以分享下我既努力或者交流心得，或者係問價代為製作都可～
