飲茶
夜晚放工同女友去左沙田麗豪酒店拎先前買落既奶黃月餅，跟手就搵下有冇野食醫下肚啦，跟住就見倒呢一間食點心既地方 – 車仔記點心皇，就入去食野，叫左6-7 個點心女友就阻止我喇，怕叫得太多食唔晒，事實我地食完果6-7點心已經好飽，好彩冇再叫咋，雖然就唔算話係好好味，但都叫滿足倒我鐘意食點心啦，我諗我地下次唔知食乜既時候，都會再黎!
夠用, 唔夠駛
聽公司 admin 講, 我地黎梗今個月會加人工, 點解咁奇怪 9 月份會加人工? 其實每年我地都會加, 只係今年金融海嘯, 經濟唔好, 公司決定今年年中, 姐係六月先再檢討, 結果決定加返俾我地, 大約係 2%, 幾百蚊, 不過都好過冇既.
節檢係美德, 但人生在世流流長, 物質社會又有大量毒物(相機, 鏡頭, 養魚………), 每日塗毒住你, 試問一個凡人, 又點可以忍得倒, 忍倒既都應該可以脫離凡世, 早登極樂. 自問人工唔算好高, 但比上不足, 比下有餘. 夠用, 但唔夠駛. 對住毒物, 想破戒就好似係身上切舊肉出黎, 肉痛兼肉赤, 銀包仲流血不止, 唉! 幾時先可以夠用, 又夠駛?!?!
長曝慢快門
之前陪女朋友返學, 佢叫我等埋佢放學, 因為佢只係返去用15 分鐘做個 presentation, 我就等埋佢一齊走啦, 咁自己一個人冇野做, 就四圍行下, 拎起個相機影下相啦. (最後我係等左差唔多一個鐘)
影低左呢張長曝慢快門, 個畫面就唔算好靚, d 燈尾唔夠彎彎曲曲, 不過冇計啦, 個地方限制左.
lomo 菲林
Lomo Lca 係一部菲林機, 而菲林既種類咁多, 咁過5-6 隻, 至鐘意都係佢 AGFA CT 100, 再配合 E 沖C既效果, 就會有一種藍死人既感覺, 如果配合晒天氣好, 影出黎既相真係不得了咁靚. 另外 Lomo 自已出既 X-pro silde 亦都係藍死人既菲林黎, 鐘意藍調既朋友, 可以一試.
今日為 twinspanda 網頁設計下個框架, 每頁入面應該有d 乜, 整好個 flow 佢, 睇黎聽日應該可以交功課了.
意粉
星期日一起身, 就見倒亞媽黎左我屋企, 幫我執下屋呀, 掃下地咁, 我都廢事理佢, 我有我上網聽歌, 無啦啦佢話食得飯, 竟然係意粉, 印象中亞媽好似10 幾年黎都冇整過意粉俾我食, 為左紀念呢個意粉, 我決定幫佢影張相.
亞媽, 下次可唔可以加d 腸仔呀, 豬扒呀, 總之是但乜都加d, 唔好得果少少肉醬得唔得? 跟住就聽倒 “食你就食啦, 咁多野講”………………….
lomo lca 台灣遊
相機 : lomo lca
菲林 : Agfa CT Precisa 100, e沖c
6 月去台灣旅行, d 相早幾日先拎去曬相, 真係好鬼懶,
去旅行之前香港打大風, 飛機仲遲左一個鐘先起飛, 橫風橫雨, 不過, 當飛機一穿過左d 厚雲, 藍天白雲就出現喇, 靚到丫, 即刻拎個相機出黎影下先.
