bye bye David Beckham
佢為左可以再次為國家隊上陣, 踼完美職既聯賽後, 今年第二年以外借身份去到意甲效身 AC, 希望可以得到英格蘭領隊卡比路既重召, 為國效力.
佢既努力當然冇白費, 領隊再次召用碧咸為國家隊上陣, 當然仲未肯定可以包括係世盃 23 人大名單內, 但相信機會好大, 但人算不如天算, 係AC 既比賽末段傷出, 幾乎可以肯定缺席黎梗係世界盃, 無論對佢, 對英格蘭, 對球迷都係一個好大既損失. 而我自己都因為咁而好唔開心. 點解一個咁努力既人, 個天要咁對佢.
人生就係咁, 天意弄人, 你計劃好晒既野, 以為咁做實冇死既時候, 突然一野打沉你, 唔通做人真係要盡人事, 聽天由命 ?
little baby
今日冬至, 正所謂冬至大過年, 公司放早一個鐘, 而我都快快手返屋企沖個涼換件衫, 再回老家做節. 自從家姐 BB 鉦鉦出世之後, 每逄大家見面, 都係圍住 BB 黎玩, 爭住抱爭住玩, 因為佢實在太靚仔可愛喇, 真係飯都食少幾啖, 希望佢快高長大, 好好享受小朋友俾人照顧, 無憂無慮既成長日子, 出黎社會做野一段日子既朋友, 我諗大家都有諗過, 想做返小朋友, 做大人實在太多野煩喇, 諗係咁諗, 現實還現實, 大家都係加把勁吧 !!!
Sunday working day
星期日都係上班既日子, 你一定覺得好辛苦吧, 好在有我陪你返工, 等你覺得無咁慘. 其實我相信你工作上既努力, 一定會換黎成果, 你工作升職不是偶然, 不是好運吧, 而係你真真正正有付出過努力. 努力吧 !
一起為將來努力吧 !!
p.s. 近來喜歡左呢種淡淡既色彩.
Audi R8
和拍檔都喜歡既 Audi R8, 當然我係冇咁有錢可以擁有一架真車, 但有時望下係書桌上既模型, 都可以好開心, 希望有一日可以真真正正擁有一架.
係屋企試影既, 已經好小心抺走d 塵, 但原來都仲有唔少, 下次小心d 先得.
Audi R8
和好友兼拍檔一樣都喜愛既 Audi R8, 他愛白, 我愛黑. 不知道有否一日, 我們可以將它買下, 好好滿足一下我們兩個 Audi 迷.
一黑一白的 Audi 泊在街邊的畫面, 我深信不會太遠 !
Lomo Wall
突然好想換左屋企廰既果幅晝, 靈機一觸, 不如將平日曬左既 lomo 相放入去, 就同女友亂砌一個相框出黎, 就好似人地既 lomo wall 咁, 不過就唔係砌得好工整, 有少少相都斜斜地, 我地決定一個月就換一次入面既相, 睇下又有冇咁勤力 ?!?!
飲茶
夜晚放工同女友去左沙田麗豪酒店拎先前買落既奶黃月餅，跟手就搵下有冇野食醫下肚啦，跟住就見倒呢一間食點心既地方 – 車仔記點心皇，就入去食野，叫左6-7 個點心女友就阻止我喇，怕叫得太多食唔晒，事實我地食完果6-7點心已經好飽，好彩冇再叫咋，雖然就唔算話係好好味，但都叫滿足倒我鐘意食點心啦，我諗我地下次唔知食乜既時候，都會再黎!
夠用, 唔夠駛
聽公司 admin 講, 我地黎梗今個月會加人工, 點解咁奇怪 9 月份會加人工? 其實每年我地都會加, 只係今年金融海嘯, 經濟唔好, 公司決定今年年中, 姐係六月先再檢討, 結果決定加返俾我地, 大約係 2%, 幾百蚊, 不過都好過冇既.
節檢係美德, 但人生在世流流長, 物質社會又有大量毒物(相機, 鏡頭, 養魚………), 每日塗毒住你, 試問一個凡人, 又點可以忍得倒, 忍倒既都應該可以脫離凡世, 早登極樂. 自問人工唔算好高, 但比上不足, 比下有餘. 夠用, 但唔夠駛. 對住毒物, 想破戒就好似係身上切舊肉出黎, 肉痛兼肉赤, 銀包仲流血不止, 唉! 幾時先可以夠用, 又夠駛?!?!
意粉
星期日一起身, 就見倒亞媽黎左我屋企, 幫我執下屋呀, 掃下地咁, 我都廢事理佢, 我有我上網聽歌, 無啦啦佢話食得飯, 竟然係意粉, 印象中亞媽好似10 幾年黎都冇整過意粉俾我食, 為左紀念呢個意粉, 我決定幫佢影張相.
亞媽, 下次可唔可以加d 腸仔呀, 豬扒呀, 總之是但乜都加d, 唔好得果少少肉醬得唔得? 跟住就聽倒 “食你就食啦, 咁多野講”………………….
